DELFI Dzejas dienu konkursā iesniegtie darbi

close-ad
Saturs turpināsies pēc reklāmas
Reklāma
nu redzi

nu redzi
mes runuosim
putnu i cylvāku bolsūs

nu redzi
tys pasauļs kū cieli
beja jau viesturis gruomotā
školys hrestomatejā palākūs nūplāstūs vuokūs
veļ aizviņnakt i jau senejuos Divupis laikūs
kod rokstūs cylvāks atsazyna vīntuleibā i grākā

nu redzi
dīnys kai krelleitis kreit
asfalta škierbuos i reņstelis caurumūs malnūs

tova vīntuleiba nav izdūmuota
jei iz muola plēksneitem roksta
par tovim i munim bolsym

nu redzi


autoūsta

bolūži palāku rudiņa dabasu kruosā. i čāguoni malni kai valni
kaijis sudobra spuornim kai īsamaļdiejušys. voi ari pa eistam
staigoj i klemš, maizis druponu kleņčej
paraugi naīdūt! aizīs da cyta

ļaužu symti pi platformu
kruojās kai dziernovu muorkā
lēpinis, iudiņa lopys iudinī malnā
plastmasys butylkys maun i nazkaidi syudi
zivu smoka nu tierga pādejuo paviļjona
nazkur daugova, jiura. nazkur viļni
ite kanalā iudiņs kai īryusiejs, sasastuojs glums
autoūsta

čygonkys speideigys
malnuos suknēs ar zeļteitu dzeipuru streipem
pučis, volani, kleini i buorksts. rišeļje roksti
kopcenis smolkys. papīdeiši kai ciersti
pazeileišu
tev reitu byus laime

īt saule iz pušdīnis laiku
vieja aprautūs dabasūs grymst
reitu sūlēja sutūni, pārkiuņa leitu i zibsni
reitu myusu vairs nabyus
autoūsta

ļauds sasastuoj, nūsastuoj, skrīn
treisdesmit catūrtais, treisdesmit pīktais. sastais. septeitais. symtais
kurs vēļ ar biletu?
sādvītu nav! dabuosit stuovēt
par šaļti jiusu ite vairs nabyus
a nazkam te vysa dzeive

autoūsta
iz garmanis spielej vecs sierms i ar vīnu kuoju
dasyt ritmu. golvu damīdz pi garmanis suonu
jis varbyut tū garmani atvede leidza
psrs
mes pasauli jaunu sev ceļsim
mes īsuoksim jaunu dzeivi

jam reitu byus septeņdesmit
jis ite jau sešdesmit godu

iz asvalta bolūžu māsli i spolvys
asnis iz sīnys
iztrīpti ašņa i nuovis roksti
ak jau pa nakti kaids kuovīs
ak jau ka izdzeivuoja. ak jau ite nu tierga

melodeja
čeikst vaca kai žyda roti
nu veča garmanis škeibuos
jam reitu byus septeņdesmit
jis ite jau vysu dzeivi


sāta

nazkas nūkloudzēja
nazkaidi bolsi
i munam pasauļam īlyuza tylti
vuortu eņdžēs pasakuore ziernūkļa teikli
putekļu pādi lūgu styklūs i saulē

ap munu sātu
pasauļa pluovi staigoj
mierej pakšus, īreikoj garažys sovom gūvim
pi azara atpyutys vītu taisa
pogolma zuoleitē šašliks

atsagrīzs bezdeleigys
pašelē ligzdenis lepēs i klīgs
bacjans sorkonom kuojom staiguos ap muorku
klabatys klabynuos, sēdēs iz jumta
kačs puorīs par pogolmu
suneits butkā pi pakša

vyss tai nazkod jau bejs

betona plitkom izlyktā pogolmā
bierneni pakriss i rauduos
olpom klīgs
cytā volūdā mamys sauks
suopēs

nazkur vydspusē škūrstiņa izdrupušo
pamastuos sātys dvēsele

vys jau tei poša
cyts laiks


laime

naskaidra laimis jutūne
verūtīs saulē

rudiņa gaisā
nazkas nu laimis
nu bejušim laikim
kod laimei i nalaimei beja cytaidi vuordi
juos guoja pa pasauli cylvāku meklēt
i sātā nabej nivīna

juos mane naatroda
es jom gadiejūs ceļā

kab na mane
juos byutu pagaisušys rudiņa zuolē
juos byutu cytys

i es cytā gaisā


es byušu

es naīšu
es laikam naatīšu
vīn vuordi klusumā kai malnys ziļbis kreit
bez atbolsa i bolsa nakurīnē

es laikam naīšu
es laikam naatīšu
koč itam laikam malnys durovys
i kaču acs kai zybādamys ceļa moluos speid
es laikam naatīšu

kai ratys ziļbis kreit
kai nūdzysdamys pierksts
kai peisā guņtenis
kai meža bolsi rudiņūs
kai mygla palejuos i viersā kuop
vīņ saulis lāktā māma sakreit zemē
bez kaidys nūzeimis kai tukšys skanis

pa šaļtei dzeivuošu
pa šaļtei byušu
bez kaidys nūzeimis i kaida jāga
ar kaču gunim ceļa molā narunuošu

es tik tai byušu
Seko Delfi arī Instagram profilā – pievienojies, lai uzzinātu svarīgāko un interesantāko pirmais!
Publikācijas saturs vai tās jebkāda apjoma daļa ir aizsargāts autortiesību objekts Autortiesību likuma izpratnē, un tā izmantošana bez izdevēja atļaujas ir aizliegta. Vairāk lasi šeit.

Comment Form